Konpainia parekideak «positiboki» baloratu du aurtengo alardean emandako urratsak. Keinuen urtean, 26 urte ondotik Hondarribiko Udalaren borondatean aldaketa eman dela adierazi du konpainia parekideak.

Aurten ikuspegi instituzionalean aurrerapauso garrantzitsua eman dela uste Jaizkibelek. Bereziki udalarekin harremanetan, komunikazio bideak normalizatu egin direlako. Eta jaietan Jaizkibel konpainiak antolatutako ekintzetan udal gobernuak ere parte hartu duelako.

Halere, herrian alarde parekide baten kontra daudenak, berdintasunarekin arazo bat dutela agerian geratu dela uste du Ane Lekuona Jaizkibel konpainiako kideak. Izan ere, irailaren 3an Hondarribia Berdintasun Hiria Sariaren banaketan, “talde batek sarrerak erreserbatu egin zituen Itsas Etxea hutsik uzteko asmoz”. Hor ere, udal ordezkarien jarrera eskertu dute. «Jaizkibel herrian bakarrik dagoela irudikatu nahi zutenen aurrean, boikotaren aurrean, udalak ateak zabaldu egin zituen eta ekitaldia bete egin zen», argitu du

Dena dela, aurtengo alardean emandako urratsetatik haratago, eman beharrekoekin pentsatzen du Jaizkibelek. Elkarrizketa bideak ireki nahian, “konponbiderako mahai bat abendua baino lehen eratu dezala” eskatu diote Igor Enparan Araneta alkateari. Eta bertan parte hartu nahi ez duen eragilerik baldin badago, daudenekin aurrera egin dezala.

Zentzu honetan, Hondarribiko EAJren inmobilismoa ez zaio oharkabean pasa konpainia parekideari. Gogor salatu du alarde egunaren atarian talde jeltzaleak plazaratu zuen oharra. “Oso larria da konponbiderako urratsik emateko inolako borondaterik ez agertu izana, eta Gipuzkoa eta Hondarribiko EAJren iritzi eta jokaerak hain desberdinak izatea”, diote, Eider Mendoza diputatu nagusiak harrera egin ziela aintzat hartuta.