BDS Koop eraldaketa fabrikak proposatzen duen BiziHIRIak foroa ospatuko da larunbata honetan Irunen. Trantsizio ekosozialak eta hiri ereduaz alternatibak proposatzeko helburua du ekimenak. Agroekologia, ekofeminismoa edota mugikortasun jasangarrian lanean diharduten hainbat eragile sortu dira azken urteotan Txingudi bailaran. Orain eskualdeko ikuspegia bultzatzeko saretze lana behar da. Eta ideia horretan oinarritu da BDS Koop eraldaketa fabrika BiziHiriak egitasmoa abian jartzeko.

Marko horren baitan, jardunaldia antolatu dute larunbatean Palmera Montero gunean goizeko 10:00etatik aurrera. Eskualde ikuspegia landuz, ekonomia sozial eta eraldatzailean ari diren eragile edo elkarte desberdinak bilduko dituzte solasaldi baten bueltan. Hiritik At, Parean, Balazta, Sorburu baratza, RecyclArte edota Dunboa ikastetxeko gurasoen elkarteak parte hartuko dute besteren artean.