Baztanen aitzinera eramaten ari diren Zinema Zikloaren barrenean, Baztango Kultura Zerbitzuak Ainarak dokumentalaren emanaldia antolatu du Iruritako Gizarte Bilgunean, bihar, martxoaren 17an, 19:00etan.

Filmak 77 minutuko iraupena du eta hau da bere sinopsia: Anne Etchegoyen abeslariaren eskutik, dokumentalaren egileek hegoaldeko Pirinioetatik Maulera milaka emakume nafar eta aragoiarrek 1870 eta 1940 bitarteko urtetan egindako bideari heldu zioten. Ainarak, hegaztiekin duten antzagatik hala deituak, neguero joaten ziren abarken industrian lan egitera. Udaberrian etxera itzultzen ziren, bertako ekonomiari laguntzeko, beren familia eratzeko eta bizitza berri bati ekiteko. Denboran, geografian eta inguruabar historiko eta pertsonaletan zeharreko bidaia bat kontatzen da hemen, artxibo, dokumentu, argazki eta elkarrizketen bidez azaldua.