Eusko Alkartasunak 'Mugarik gabeko alkartasuna' lemapean burutuko du bere eguna. Ohiko ekitaldi politikoarekin batera, migratzaileek Bidasoa ibaiaren bi aldeetan jasaten dituzten giza eskubideen urraketak salatu nahi ditu.

Eusko Alkartasunak alderdiaren urteroko jaia berreskuratu du aurten pandemiak eragindako geldialdiaren ondoren. 2019az geroztik ez du ‘Alkartasuna Eguna’ ospatzerik izan, eta aurtengoan ekitaldi politikoa helburu solidario batekin uztartuko du. Izan ere, 'Mugarik gabeko alkartasuna' lemapean ospatuko dute migratzaileek Bidasoa ibaiaren bi aldeetan jasaten dituzten giza eskubideen urraketak salatzeko. Maider Otamendi, Eusko Alkartasunako antolakuntza idazkariak aipatu digunez, eskualdeko harrera sareekin harreman zuzena duten alderdikideak daudela probestu dute Urruñan antolatzeko.

Hala, ekitaldi politikoarekin batera, Harrera Elkartearen aldeko herri-bazkari solidarioa ere antolatu dute. Ondoren, Niko Etxart eta Anje Duhalderen doako kontzertuak izango dira bertan. Halaber, azken urteetan hil diren afiliatuak omenduko dituztela, bereziki, Philippe Duluc, Iparraldeko militante abertzalea.