Landa eremuaren etorkizunerako herri alternatiba orain izenburupean, egun osoko egitaraua prestatu dute, tartean gonbidatu bereziekin landa eremuaren inguruan hausnartzeko mahai-ingurua ere.

Bortzirietako, Malerrekako eta Baztango Ernai-k Baztan-Bidasoako gazteen topaketa antolatu du heldu den martxoaren 18an, larunbatean, Donamarian. Landa eremuaren etorkizunerako herri alternatiba orain izenburua jarri diote topaketari, hain zuzen ere landa eremuko herriek azken urteotan jasaten ari diren arazoei irtenbideak bilatu nahi dizkietelako bertan.

Donamarian eginen du gazteen topaketa Baztan-Bidasoa eskualdeko Ernai-k. Josu Txoperena Bortzirietako Ernai-ko kideak azaldu digunez, “errazagoa izanen litzateke Donezteben, Lesakan edo Elizondon egitea, baliabide gehiago daudelako, baina herri ttiki batean egin beharko litzatekeela uste genuen. Herri handiagoa baten burbuila horretatik ateratzeko eta egiazko landa eremuko errealitate gordina zein den ikusteko”.

Landa eremuan ematen ari den etxebizitzaren problematikaren, enplegu faltaren edota zerbitzuen desagertzearen inguruan hausnarketa egiteko baliatuko dute eguna. Horretarako, hainbat jarduera antolatu dituzte egunean zehar. Horietako bat 12:00etan eginen duten mahai-ingurua izanen da. Bertan parte hartzera Joseba Otondo Baztango alkatea, Gotzone Sestorain Leitzako idazle eta nekazaria eta Tasio Erkizia hainbat proiektu ekologistetan aditua den politikaria gonbidatu dituzte. Helburua adituen aldetik landa eremuko herrien errealitatea ezagutzea izanen da eta, hortik hasita, alternatiba bat bilatzea gazteek etorkizun duin bat izan dezaten euren bizilekutan.

Honez gain, pilota partidak, bazkaria, aurtengo Gazte Topaguneko bertsoen aurkezpena, tailerrak, Km0 Tonbola, elektrotxaranga eta kontzertuak ere izanen dituzte. Txoperenak jakinarazi digunez, oraindik ere bazkarirako txartelak salgai daude, Donamarian, Donezteben, Elizondon, Beran edota Lesakan ere. Ernai-ko sare sozialetan ere eskatzeko aukera egonen eta edo zuzenean kideengana jota.

Bukatzeko, Txoperenak gazteak animatu nahi izan ditu Donamariara gerturatzera, eskualdeko herrien errealitatea zein den ezagutzera, baita hausnartzera ere, eta denek elkarrekin etorkizun duin baten alde borrokatzera.