Irunen dena prest dago asteburu honetan bertan alarde eguna prestatzeko lehen entseguetarako. Egun bereziak izango dira, bereziki, Antxon Jauregi Vidal 19 urteko irundarrarentzat. Irungo Alarde parekidean aurten estreinatzen den San Miguel konpainia berrian kantinera izango da.

Gizon batek kantinera rola hartu izanak, hautsak harrotu ditu azken asteetan. Are gehiago bere itxura fisikoari tradizioz feminitateari lotu ohi zaizkion elementuak gehitzen dizkion gizonezko bat dela jakinik. Gizona dela aldarrikatzen baitu, eta bere ametsa bete eta normak apurtzeko eskubidea aldarrikatzen du. Bere ustetan, azken batean alardea antzerki edo errepresentazio bat da, eta bertan norbere papera joka dezake.