ZIZTAKA kolektiboa, Irunen euskara eta kulturarentzat arnasgune bat sortzeko helburua duen dinamikak, gogoeta prozesu bat abiatuko du. Irunen ‘Kafe antzoki’ proiektu bat martxan jartzeko asmoa dute. Eta azken hiru urteotan auzo elkarteekin, udal talde politikoekin, eta bereziki, 150 bat euskal eragile eta norbanakoekin eramandako prozesu parte-hartzailearen ondotik, fase berri batean murgiltzera doaz.

Gogoeta prozesua, martxoaren 25ean abiatuko dute. Eta Maider Ugartegarbizurekin hitzegin dugu xehetasun guztiak biltzeko.

Azken 40 urteotan Irungo euskalgintza indarrak bildu eta ahaleginetan aritu bada ere, “ondo aztertu beharko den arrazoiren batengatik” ekinaldi guztiak bidean gelditu direla aitortzen du Ziztakako kideak. Oraingo honetan, aldiz, kultura eta euskara uztartu eta eragile guztien adostasunetik bultzatu nahi duten proiektua behin-betiko sustrai sendoak errotuko dituelako itxaropena dute.