[[ blob.title | words:5 ]]

[[ time | secondsToDate | date: 'HH:mm:ss' ]]

Pausumedia

Kiroletik

Behe Bidasoako kirol elkarteen aktualitatea

Emankizuna Data
Ehun kilometroko Euskadiko Txapeldun izan dira Pineda eta Alonso irundarrak

Euskadiko Txapela jantzi dute Ana Isabel Pineda eta Xabier Alonso irundarrek, 100 kilometroko proban. Santanderren jokatu zuten Euskadiko Txapelketa larunbatean, bertan antolatuta zeuden 100 kilometroko probak baliatuta. Euskadiko onenak izateaz gainera, sailkapen nagusian, hirugarren gelditu zen Xabier Alonso (BAT), eta zazpigarren Pineda (Goierri Garaia).

Taldekako erreleboak ere jokatu ziren Santanderren, eta gizonezkoen kategorian, Bostak-Bi-K taldea izan zen onena. Bidasoko zenbait korrikalari aritu ziren talde horretan: Victor Madejon eta Javi Perez irundarrak, eta Iñigo Tumas hondarribiarra. Dunboa 8:30 Irungo taldeko kideak bosgarren gelditu ziren.

2017-06-22
Ohorezko Mailari eutsi diote BATeko emakumeek

Estatuko kategoria gorenean, Ohorezko Mailan jarraituko du Super Amara Bidasoa Atletiko Taldeko emakumeen talde nagusiak. Jaitsiera ekidin dute azken jardunaldian, Valladoliden. Horretarako, Elche aurkaria gainditu beharra zuten bidasoarrek. Erreleboen aurretik, 1,5 puntuko abantaila besterik ez zuen BATek. Bikain aritu ziren lekukoen probetan, eta mailari eutsi zioten.

Sufrimendurik ez, gizonentzat

BATeko mutilak maila bat beherago aritu dira aurten, Lehen Mailan, eta bertan jarraituko dute hurrengo denboraldian ere. Eroso eutsi diote mailari, azken jardunaldian bigarren izan baitira, Moratalazen (Madril).
 

EMAKUMEEN OHOREZKO MAILAKO LIGA (JAITSIERA EKIDITEKO JARDUNALDIA):

1- Atlético San Sebastián 112.5 p.

2- Ría Ferrol – C. Arenal 105 p.

3- Unicaja Atletismo 93 p.

4- Tenerife CajaCanarias 91.5 p.

5- CA Valladolid – U. Va 88.5 p.

6- Pielagos 83 p.

7- SUPER AMARA BAT 75 p.

8- Juventud Atlética Elche 68.5 p.

 

GIZONEN LEHEN MAILAKO LIGA (JAITSIERA EKIDITEKO JARDUNALDIA):

1- UCAM - Cartagena 94 p.

2- SUPER AMARA BAT 93 p.

3- A. A. Moratalaz 92.5 p.

4- Correr el Garbi 92 p.

5- CEA Tenerife 1984 87 p.

6- JA Sabadell 86.5 p.

7- R. C. Celta de Vigo 86 p.

8- Lleida UA 78 p.

2017-06-13
Gutxi iraun du zortziko finaleko esperientziak

GRANOLLERS 31-29 BIDASOA

GRANOLLERS: Álamo, Cabanas (3), García, Ferrer, Figueras (7), Cañellas (5), Resina (2). Vicente (4), Flores, Arnau García (2), Pérez (4), Guàrdia, Sastre, Cumplido, Da Silva (4), Kasal.

BIDASOA: Zubiria, Aldaba (1), Nonó (2), Odriozola (10), Borragán (7), Serrano (3), Lancina (1). Dejanovic, Cavero (2), Martínez, Beltza, Muiña, Basaric (1), Azkue, Popovic (2).

MARKAGAILUA: 1-3, 3-5, 6-7, 8-7, 12-10, 17-13 (atsedenaldia), 19-16, 22-18, 24-21, 27-24, 30-25, 31-29.

Lehen kanporaketan gelditu da Bidasoa Errege Kopako zortziko finaletik kanpo. Ligako laugarren sailkatuari aurre egin dio Leonen, baina ez du aurrera egitea lortu.  Zubiria atezaina fin ibili da hasieran, eta lehen abantailak bidasoarren aldekoak izan dira. 15.minututik aurrera, ordea, Granollersek aginte makila hartu du. Lau goleko errenta eskuratu du atsedenaldirako (17-13).

Aldagelatik bueltan, 5-1eko defentsarekin saiatu da Bidasoa, eta errenta murriztu du, Kauldiren bi golei esker (17-15). Lehian jarraitu du Bidasoak, eta gol bakarrera hurbiltzeko aukera galdu du 20.minutuan. 3-0 eko partzial batekin, norgehiagoka erabaki du Granollersek. Barcelonak irabazi du Errege Kopa, laugarren aldiz segidan.

Kontratua luzatu dio klubak Cuétarari

Jacobo Cuétara entrenatzailearen kontratua luzatu du Bidasoak. 2017/2018 sasoiaren amaierara arteko konpromisoa zuten, baina 2020ra arte luzatuko dute harremana. Entrenatzaile asturiarra 2016ko udaran iritsi zen Artalekura, eta lehen denboraldian, taldea Asobal Ligan mantendu eta Kopako zortziko finalera sailkatu du.

2017-06-12
Euskadiko Trialsinean bidasoarrak dira nagusi

Ion Areitio hondarribiarrak irabazi du Euskadiko Bike-Trial Txapelketa, igandean Irungo Puianako zirkuituan. Podiumean, beste bi bidasoar izan ditu ondoan. Gorka Susperregi hondarribiarra izan da bigarren, eta Iker Rodriguez 17 urteko irundarra hirugarren. Gipuzkoako Txapelketan ere, podiumeko postu berdinetara igo ziren hiru pilotuak.

2017-06-06
Mutrikuko banderarik gabe geratu da Hondarribia, Urdaibai menderatu arren

Ez ohiko podiuma izan zuen Mutrikuko estropadak, larunbatean: Orio B, Kaiarriba eta Santurtzi. Orio Arraunketa Elkarteko gazteek irabazi zuten, beraz, Mutrikuko Udalaren Ikurriña (21.25). Hondarribia Arraun Elkarteko Ama Guadalupekoa laugarren txandan aritu zen, beste faboritoekin batera. Eguraldia zeharo zakartu zen, eta kalte egin zien denei. Hondarribia bosgarren sartu zen, zazpi segundora, eta Urdaibai zazpigarren, 16ra. Test gisa balio duen estropada izanik, Urdaibairen aurretik sartu izanarekin konforme gera daitezke berdeak.

2017-06-06
Porrotarekin amaitu du liga Bidasoak

Cangas do Morrazoko O Gatañalen galdu zuen larunbatean Bidasoak, 2016/2017 sasoiko azken jardunaldian. Galiziarrek mailari eutsi zioten garaipenari esker. Neurketari hasiera ona eman zioten irundarrek, eta lehen abantailak eduki zituzten. 12.minutuan 8-9 irabazten ari zen Bidasoa. Hortik aurrera, etxekoek agintea hartu zuten. Zaleen laguntzarekin, erasoko joko eraginkorra egin zuen Morrazok, eta 20 gol egin zizkion Bidasoari lehen zatian (20-16).

Defentsako planteamendua aldatu eta 5-1ekoa osatu bazuen ere, Bidasoak ezin izan zuen galiziarren bultzada gelditu. Azken txanpan markagailuan gerturatzea lortu zuen, 28-26koarekin. Morrazok, ordea, ez zuen Asobal Ligan jarraitzea arriskuan jartzetik utzi. Hamaikagarren postuan bukatu du liga Bidasoak, 23 punturekin. Kopakoa izango da Bidasoaren hurrengo hitzordua, ekainaren 9an 19:00etan Leonen, Granollersen aurka.

Leo Renaud Bidasoara itzuliko da

2017/2018 denboraldirako lehen fitxaketaren berri eman du Bidasoak. Leo Renaud frantziarra (1987) Artalekura bueltatuko da, eta bi denboraldiz defendatuko du Bidasoaren elastikoa. 2011tik 2013ra jokatu zuen Renaud-ek Irunen, Asobal Ligara jauzia eman aurretik. Bi denboraldi egin zituen ondoren Ciudad Encantadan. Azken bi urteetan, Frantziako ligan aritu da, Istres-en eta Caen-en.

2017-05-29
Laugarren postua saihestu dute berriro BATeko emakumeek

Helburua bete du berriro Super Amara BATeko emakumeen talde nagusiak, Ohorezko Mailako ligako bigarren jardunaldian. Valladolid taldea utzi zuen atzean, larunbatean Iruñean jokatutako hitzorduan. Lehen jardunaldikoa baino abantaila erosoagoa lortu zuten bidasoarrek, 4,5 puntu atera baitzizkioten oraingoan arerioari. Playas de Castellón eta Pamplona AT urrun izan zituen BATek, baina helburu zuen hirugarren postua eskuratu zuen. Hortaz, indarrez iritsiko da azken jardunaldira, mailari gorenari eusteko aukera sortarekin. Ekainaren 10ean izango da hirugarren eta azken hitzordua.

Mailari eusteko lehian izango dira gizonezkoak

BATeko gizonezkoen talde nagusia kategoria bat beherago ari da, eta Lehen Mailari eusteko hitzordu erabakigarria jokatuko du ekainaren 10ean. Hori ekiditeko, lehen edo bigarren postuan amaitu beharra zuen bigarren jardunaldian. Hirugarren izan zen, ordea, Alcorcónen eta Algecirasen atzetik. Sabadell izan zen laugarren, Alcorconen jokatutako saioan.

2017-05-23
Asobal Ligan jarraituko du Bidasoak

BIDASOA 34-31 VALLADOLID

BIDASOA: Dejanovic, Vazquez (3), Nonó (3), Kauldi (10), Borragán, Serrano (4), Azkue (7). Zubiria, Cavero (1), Cristian (1), Beltza, Aldaba (1), Muiña (2), Basaric, Popovic, Lancina (2).

VALLADOLID: Díaz, Turrado (1), Hernández (6), Río, Serdio (3), Miguel Camino (3), Rodríguez (5). Diego Camino (2), López (1), De la Rubia (1), César Pérez, Roberto Pérez (1), Matías (5), Serrano (4), Lorasque, Dujshebaev.

MARKAGAILUA: 2-1, 4-4, 4-8, 7-11, 11-14, 15-16 (atsedenaldia); 17-19, 21-24, 24-26, 29-29, 31-30, 34-31.

Azken aurreko jardunaldian erdietsi du Bidasoak denboraldiko helburua. Bolada txarra izan du azken hilabetean, baina Valladolid Artalekun gaindituta, Asobal Ligan segiko duela ziurtatu du. Norgehiagoka zaila izan da, bidasoarren urduritasunaren eta arerioaren eskubaloi mailaren eraginez. Lehen zatian, Valladolid nagusi izan da, eta bost goleko abantaila ere izan du, 5-10ekoarekin. Hutsartea eskatu behar izan du orduan Jacobo Cuétarak, 16.minutuan. Atsedenaldiaren aurreko minutuetan hobera egin du etxeko taldeak, eta 15-16ra gerturatu da.

Bigarren zatia ondo hasi da, Dejanovicen gelditu baten ondoren, Azkuek markagailua berdindu baitu, zazpi metrotako arrastotik (16-16). Hala ere, azken bost minutuetara arte, Valladolidek eduki ditu abantaila gehien-gehienak. 31-30ekoa sartu du Kauldik orduan, taldearen defentsako lan onaren ondoren. Zumaiarra izan da azken txanpako protagonista, Zubiria atezainarekin batera. Bi jaurtiketa gelditu dizkie usurbildarrak Hernándezi eta Serdiori. Kontraerasoetan, Kauldik ez du barkatu. Azken lau golak sartu ditu zumaiarrak, bidasoarren garaipena bermatzeko. Jokalariek eta zaleek bat egin dute partidako une askotan, eta amaieran ere, elkarrekin ospatu dute lorpena.

2017-05-20
Balentria egin du Hendaiak

HENDAIA: Chaudière – Bainconau, Azpeitia, Gaillardet, Jaubert Alzate – Jimenez, Lopez Herrero – C. Pinon, Betachet, Sallenave – V. Pinon, Vial – Hiriart, Azpiroz, Larribe. Aldaketak: Cazet, Ibarburu, Eceizabarrena, Zubizarreta, Labarthe, Ducoté, Laurent.

MAZAMET: Marvielle – Tabu, Pages, Marty, Marteau – Hallinger, Garric – Maffre, Assemat, Ruiz - Rayssac, Zas Moreira – Destruelles, De Sousa, Nuninger. Aldaketak: Basso, Jobe, Maris, Froissard, Marquié, Mouffok, Compagnon.

Final laurdenetara pasa eta Fédérale 1 mailarako txartela eskuratu du Hendaiak. Hamabi puntuko desabantaila zuen Mazamet aurkariarekiko, joanekoan galdu ondoren (27-25). Baina norgehiagoka bikaina osatu zuten xuriek. Arratsalde gogoangarria izan zen Ondarraitzen. Defentsan harresi gaindiezina osatu zuten bidasoarrek, eta erasoan, baliabide sorta eta eraginkortasun itzela erakutsi zituzten. Ahaleginak saria eman du, eta Fédérale 1 mailan lehiatzeko eskubidea du Hendaiak. Erronkaren bideragarritasuna aztertu beharko du orain klubak.

2017-05-15
Ligaren amaiera korapilatu zaio Bidasoari

BENIDORM: Mijuskovic, Cuartero, Grau (9), Pablo Simonet (5), Emilio Esteban (2), Eloy González (1), David Jiménez (1). Marchán (3), Torriko (2), Corzo (1), Vallés, Salinas (4), Héctor González, Iván Rodríguez, Calle.

BIDASOA: Dejanovic, Cavero, Crowley, Nonó (2), Azkue (1), Borragán (4), Serrano (4). Kauldi (7), Aldaba (1), Beltza, Vázquez (1), Martínez (1), Popovic (2), Lancina (1), Zubiria.

MARKAGAILUA: 3-2, 7-4, 8-4, 10-5, 13-6, 14-9 (atsedenaldia), 16-13, 19-16, 22-17, 24-19, 25-21, 28-24.

Apirilaren lehenean lortu zuen ligako azken garaipena Bidasoa-Irunek. 21 puntuak mailari eusteko aski izango zirela zirudien, baina aurkariak behetik gora datoz, eta estu hartu dezakete talde bidasoarra. Larunbatean Benidorm aurkari zuzenaren etxean galdu zuten horiek. Borraganek sartu zuen arratsaldeko lehen gola, eta Nonók 1-2koa. Hortik aurrera, Benidorm izan zen nagusi. 6-0ko partziala jaso zuen Bidasoak, hurrengo minutuetan. 13-6ra ihes egin zuten etxekoek 25.minuturako.

Bigarren zatian, hiru goleko desabantaila izan zuen, gutxienez, Jacobo Cuétararen taldeak. Bi jardunaldi gelditzen dira liga bukatzeko, eta hiru puntuko errenta du Bidasoak jaitsiera postuekiko. Larunbatean Valladoliden bisita hartuko du, Artalekuko azken neurketan.

2017-05-15
Erronka zaila du Hendaiak, final laurdenetara heltzeko

MAZAMET 27-15 HENDAIA

MAZAMET: Nuninger, De Sousa (Basso 62'), Destruelles (Jobe 59'), Zas Moreira (Maris 41'), Rayssac (Froissard, 65'), L. Ruiz, Assemat (Marquié 65'), Maffre, Garric, Hallinger (Compagnon, 70'), Marteau, Marty (Mouffok 65'), Pagès, Marvielle.

HENDAIA: Larribe, (Ibarburu 40'), Azpiroz (Cazet,40'), Hiriart (Eceizabarrena 40'), Vial, Pinon, Lecalvez, (Labeguerie 40'), Sallenave, Betachet, Laurent, Jimenez, Jaubert, Gaillardet (Lopez 50'), Azpeitia (Ducoté, 62'), Bainçonau, Chaudiere.

Kolpea jaso du Hendaiak, Fédéral 2ko final zortzirenetako joanekoan. Abantaila handia lortu zuen Mazamet aurkariak igandean, etxean aritzearen abantaila baliatuta. Neurketa osoan izan zen nagusi, 17-5eko aldea baitzuen atsedenaldian. Xuriek ez zuten norgehiagoka txarra egin, abagune onak izan baitzituzten. Alabaina, ez ziren eraginkorrak izan, eta gogotik ordaindu zituzten huts egiteak. Hamabi puntuko desabantaila gainditu beharko dute Ondarraitzen, kanporaketa gainditzeko. Final laurdenetara iritsiz gero, hurrengo denboraldian Fédérale 1ean aritzeko eskubidea lortuko luke Hendaiak.

2017-05-09
Lehen Mailara igo da Hondarribia Ikasbasket

Ezustekoa eman du Hondarribia Ikasbasket elkarteko emakumeen talde nagusiak, Estatuko Lehen Mailara igota. Laugarren bukatu du liga, eta ez zen faborito lauko finalerako. Astean zehar zortzi jokalarirekin entrenatzen ibili da gainera, eta talde laburrena zuen play off-ean. Hala ere, aurkariei nagusitu zaie Hondarribia, Getxoko Faduran jokatutako fasean.

Larunbateko finalerdian Logroñoko San Igbacio Venue menderatu zuten berdeek (46-58). Igandeko finalean, Iruñeko Navarro Villoslada izan da Hondarribiaren biktima. Ligako bi neurketetan nafarrak izan ziren garaile. Lehia erabakigarrian, berriz, bidasoarrak nagusitu dira. Duela bi urte sortu zen Hondarribia Ikasbasket, eta talde nagusiak bi igoera lortu ditu jarraian, Ganix Miron entrenatzailearen eskutik. Hurrengo denboraldian Estatuko Lehen Mailan ariko da.

2017-05-08
Euskal Kopa irabazi du Bidasoak

ZARAUTZ 25-26 BIDASOA

ZARAUTZ: Berridi, Atorrasagasti (4), Martínez (1), Aguirrezabalaga, Lertxundi, Balenziaga (3), Bujanda, De Carlos, Iraeta (3), Etxaniz (1), Olaizola (5), Ostolaza, Beristain (1), Josu Atorrasagasti (3), Amilibia (2), Guenaga (2).

BIDASOA: Dejanovic, Cavero, Vázquez (1), Martínez (3), Crowley (1), Beltza, Odriozola (2), Aldaba, Nonó (6), Zubiria, Borragán (3), Serrano (5), Azkue (2), Popovic (1), Lancina (2).

MARKAGAILUA: 3-3, 6-4, 8-6, 11-7, 13-10, 14-13 (atsedenaldia), 16-14, 19-16, 19-20, 20-22, 22-24, 25-26.

Aurreikuspenak bete ditu Bidasoak. Parte hartzaileen artean Asobal Ligako talde bakarra izanik, Euskal Kopa eskuratu du. Zarautz eduki du aurrean finalean, igande eguerdian Hondarribiko Hondartza kiroldegian. Oso lehiakorra izan da aurkaria, eta sufritzea egokitu zaio Jacobo Cuétararen taldeari. Lehen zatian markagailuan nagusi izan da Zarautz, eta lau goleko errenta ere eduki du, 20.minutuan (11-7).

Bigarren zatia ere bide berdinetik hasi da, baina Bidasoak estutu duenean, neurketaren agintea hartu du. Hamar minutu falta zirela, 20-23koa sartu du Jon Vazquezek kontraerasoan. Azken minutuak lasaiak izan dira bidasoarrentzat, azken gola, ia denbora amaituta sartu baitu Zarautzek.

2017-05-08
Igoera faserik gabe gelditu da Real Union

REAL UNION 1-1 SAN SEBASTIÁN DE LOS REYES

REAL UNION: Otaño, Azkoiti (Letamendia, 65'), Ekhi, Esnaola, Gorosabel, Rodellar (Thaylor, 60'), Martins, Estrada, Juan Domínguez, Ozkoidi (Arriaga, 51'), Galán.

SAN SEBASTIÁN DE LOS REYES: Alberto, Moyano, Rangel, Sergio, Juan Cruz, Neyder, Zazo; Dani Pichín, Mancebo (Fernando Ruiz, 70'), Maganto (Astray, 90'), Negredo (Kofi, 83').

GOLAK: 0-1: Dani Pichín (52').1-1: Martins (80').

EPAILEA: Alonso Prendes. Txartel horiak: Juan Domínguez (Real Union); Moyano, González, Zazo, Alberto.

Txuribeltzek ez dute igoera fasean parte hartuko. Jardunaldi bakarra gelditzen da 2.Bko liga bukatzeko, eta Unionek baino lau puntu gehiago ditu laugarren sailkatuak. Stadium Galeko azken norgehiagokan bana egin du Asier Santanaren taldeak, mailari eusteko lehian dabilen San Sebastián de los Reyesen aurka. Ondo hasi da etxeko taldea, oldarkor, gol aukerak sortuz. Lehen zatiak aurrera egin ahala, ordea, behera egin dute pixkanaka.

Bigarren zatia hasi bezain pronto, gainera, abantaila hartu du Sansek, txuribeltzen defentsako huts egitea baliatuta. Dani Pichinek egin du gola. Desabantailak min egin dio Real Unioni, eta ez da fin ibili, Mikel Martinsek banakoa lortu duen arte. Arerioen atezaina aurreratuta harrapatu, eta urrutitik egindako jaurtiketa batekin asmatu du donostiarrak. Hortik aurrera, Unionek estutu egin du, baina berandu samar iritsi da erreakzioa, eta ezin izan du bigarren gola lortu. Albiste onena, Alex Letamendia harrobiko jokalariaren debuta izan da.

2017-05-08
Hasiera ona eman dio BATek emakumeen Ohorezko Mailako Ligari

Hirugarren tokia lortu dute Super Amara Bidasoa Atletiko Taldekoko emakumeek, Ohorezko Mailako Ligako lehen jardunaldian. Maila gorenera igo berria izan arren, BATek Ría Ferrol arerioa utzi zuten atzean, larunbatean Donostiako Anoetan jokatutako jardunaldian. Ferrolek hasiera hobea eman zion, baina azken probetan hobera egin zuen BATek, erreleboetan aurkaria gainditzeraino. Errenta txikia lortu zuen BATek, Ferrolek baino 0,5 puntu gehiago. Baina hirugarren postu horrek balio handia izan dezake mailari eusteko helburuari begira.

Lehen jardunaldiko sailkapena:

Valencia Esports 240 p.
Atletiko San Sebastián 177,5 p.
Super Amara BAT 133 p.
Ría Ferrol 132,5 p.

 

Gizonak ere hirugarren, Lehen Mailan

Kategoria bat beherago ari da BATeko gizonezkoen talde nagusia, Lehen Mailan. Donostian bertan izan zen lehen jardunaldia larunbatean, eta hirugarren postuan amaitu zuen, Tenerife 1984 atzean utziaz.

Lehen jardunaldiko sailkapena:

Universidad de Oviedo 207.5 p.
Atletiko San Sebastián 168 p.
SUPER AMARA BAT 156 p.
CEA Tenerife 1984 130.5 p.

2017-05-04
Final zortzirenetan lehiatuko da Hendaia

Mazamet-en kontra ariko da Hendaia, Fédérale 2ko fase finaleko final zortzirenetan. Etxetik kanpo jokatuko du joanekoa, igandean 15:00etan. Bigarren izan da Mazamet ligan, eta Pamiers kanporatu du final hamaseirenetan.

Lehen kanporaketa hori gainditzeko, ahalegin handia egin behar izan zuen Hendaiak joan den igandean. Eguraldi txarrak eta arerioaren lehiakortasunak estu hartu zituzten xuriak. Leucatek abantaila hartu zuen bigarren minutuan, eta 0-3koari eutsi zion atsedenaldira arte. Bigarren zatian agerikoa izan zen bidasoarren hobekuntza, entrenatzaileak aldaketak egin eta gero, batez ere. Indarrez amaitu zuen Hendaiak, eta 15-6ko abantaila lortu zuen azkenean (18-23 joanekoan).

2017-05-04
Lehen zatian egindako lana zapuztu du Bidasoak bigarrenean

BIDASOA 33-34 CIUDAD ENCANTADA

BIDASOA: Dejanovic, Crowley (4), Beltza, Nonó (6), Odriozola (12), Borragán (3), Lancina (3). Cavero (1), Vázquez, Martínez, Aldaba, Zubiria, Serrano (2), Basaric (1), Azkue (1), Popovic.

CIUDAD ENCANTADA: Vial, Vainstein (6), Ariel (6), Ponciano (9), Nolasco (2), Perovic (4), Sergio López (6). Canyigueral, Mendoza, Hugo López, Vidal (1), Rafael López, Ramírez, Nicolás López.

MARKAGAILUA: 4-3, 7-6, 10-8, 12-9, 15-10, 18-13 (atsedenaldia), 19-17, 21-20, 23-24, 26-28, 30-31, 33-34.

Salbazio matematikoa lortzeko aukera bikaina galdu zuen Bidasoak larunbatean, Cuencako Ciudad Encantadaren aurkakoan. Lehen zatian nagusi izan zen Artalekuko taldea, erasoko eraginkortasunari esker, batez ere. Kauldi Odriozola hegaleko jokalariaren lana azpimarratu beharra dago, hamabi gol sartu baitzituen zumaiarrak. Sei goleko abantaila ere eduki zuen Bidasoak, eta bostekoarekin amaitu zuen lehen zatia (18-13).

Bigarrena hasi bezain pronto, ordea, 0-3ko partziala osatu zuen Ciudad Encantadak. Zortzigarren minuturako, norgehiagoka orekatu zuen (20-20). Antzeko bidea jarraitu zuen neurketak, eta hiru minutu falta zirela, 30-30ekoa irudikatu zuen markagailuak. Azken erasoan, berdintzeko abagunea izan zuen Nonók, baina ez zuen jaurtiketa ona egiteko modurik topatu, eta desbideratuta irten zen baloia. Hiru jardunaldi gelditzen dira Asobal Liga amaitzeko, eta bost puntuko errenta du Bidasoak jaitsiera postuekiko.

2017-05-01
Maila galdu du Mariñok

PAULDARRAK 3-0 MARIÑO

Euskal Ligan ariko da Mariñoko emakumeen talde nagusia, hurrengo denboraldian. Denborladi osoan kinka larrian ibili eta gero, ezin izan du jaitsiera ekidin. Azken jardunaldian, Barakaldoko Serralta futbol zelaian irabaztera behartua zegoen Mariño. Lehia zuzena zen, jaitsiera ekiditeko lehian zebiltzan bi taldeen artekoa. Pauldarrak-ek etekina atera zion etxean jokatzearen abantailari, eta Mariño mendean hartuta, mailari eutsi zion.

Presio handiko norgehiagoka zen, eta aldagelan “isiltasuna” nagusi zela aitortu du Jose Luis Altzugarai Zikiro entrenatzaileak: “Horrelako egoeretan, ezin diezu jokalariei gauza handirik esan. Badakite zer dagoen jokoan. Animatzea besterik ez da geratzen”. Berdegunera irtenda, Pauldarrak eraginkor batekin egin zuten topo. 15.minutuan lehen gola sartu zuen arerioak, eta minutu gutxiren buruan, bigarrena.

Atsedenaldiaren atarian, hirugarren gola jaso zuen Mariñok. Kolpe erabakigarria izan zen. Lur jota geratu ziren urdinak, eta bigarren zatian ezin izan zuten desabantaila murriztu. Pauldarrak-ek salbazioa ospatu ahal izan zuen. Mariñoko emakumeek, berriz, burumakur egin zuten bueltako bidaia. Sasoi osoan zehar jaitsiera postuetan sartu eta irten ibili ondoren, maila galdu dute azkenean.

2017-05-01
Kale egin du Real Unionek Logroñon

LOGROÑÉS: Miguel, Julio Rico, Jaime Paredes, Caneda, Amelibia, César Remón, Coulibaly, Salvador, Marcos André (Reguilón, 64’), Muneta (Javi Rey, 78’), Espina (Adrián León, 89’).

REAL UNION: Otaño, Gorosabel, Esnaola, Ekhi, Estrada, Rodellar, Martins, Ozkoidi (Thaylor, 65’), Mikel Alonso (Arriaga, 60’), Juan Domínguez, Galán,

GOLAK: 1-0: Coulibaly (71’).

EPAILEA: Herrero. Txartel horiak: Caneda eta Remón (Logroñés), Mikel Alonso (Real Union). Txartel gorria: Salvador.

Las Gaunas futbol zelaian galdu du Real Unionek igandean, UD Logroñesi egindako bisitan. Sasoi betean dago Errioxako taldea, baina txuribeltzak irabaztera behartuta zeuden, igoera fasean sartzeko lehiari eusteko. Ondorioz, helburua zeharo konplikatu zaio Irungo taldeari. Bi jardunaldi gelditzen dira, eta lau puntuko desabantaila du Real Unionek laugarren sailkatuarekiko.

Neurketa berdindua izan zen Logroñokoa, bi taldeek eduki baitzituzten abagune onak. Etxeko taldea indartsu sartu zen lehian, baina lehen zatiak aurrera egin ahala, txuribeltzek hobera egin zuten. Bi gol aukera argi eduki zituzten. Mikel Alonsoren jaurtiketa zutoinetik gertu pasa zen lehenengo. Atsedenaldiaren atarian, Ozkoidik kanpora bidali zuen burukada, gola sartzeko dena alde zuenean.

Bigarren zatiak ere itxura orekatua hartu zuen hasieran. Salvadorrek Thaylorri egindako falta gogorrak, ordea, hamar jokalarirekin utzi zuen Logroñes, amaierarako 20 minutu falta zirenean. Alabaina, Real Unionek ezin izan zuen abantaila baliatu. Bi minutu beranduago, 1-0ekoa sartu zuen Coulibalyk, kontraeraso bat borobilduta. Azken txanpan aurrera pausoa eman zuen Asier Santanaren taldeak, baina ez zen gai izan etxeko taldeari min egiteko. Erabakigarria izan daitekeen porrota jaso zuen azkenean.

2017-05-01
Europarako txartela ziurtatu du Leka Eneako gizonezkoen talde nagusiak

Hurrengo denboraldian Europako lehian ariko da Leka Enea mahai tenis elkarteko gizonezkoen talde nagusia. Liga lehen sei sailkatuen artean bukatzea bermatu du, larunbatean Burgosen irabazita (1-4). Errenta handia lortu zuen azkenean markagailuan, baina neurketa orekatua izan zen, hala ere. Endika Diezek, Jaime Vidalek eta Dorde Borcicek osatu zuten talde irundarra. Laugarren postuan amaitzeko aukera ere izan dezake Leka Eneak. Momentu honetan toki horretan dagoen Arteal Santiago hartuko du hurrengo jardunaldian, Sonia Etxazarreta teknifikazio zentroan. Bi puntu gehiago dituzte galiziarrek.

Emakumeen taldearentzat amaitu da aurtengo liga, eta ez du lortu Europarako sailkatzea. 0-4 galdu du azken jardunaldian, Priego bosgarren sailkatuaren kontra. Jin Zhang eta June Izquierdo eta June Garcia gazteak izan ziren talde irundarraren ordezkariak. Emakumeen bigarren taldeak, Ohorezko Mailara igotzea lortu du. Beraz, hurrengo denboraldian Leka Eneak emakumeen taldeak edukiko ditu lehen bi kategorietan.

2017-04-26
Mailari eusteko azken aukera izango du Mariñok

MARIÑO 0-1 LOGROÑO

Jardunaldi bakarra gelditzen da Emakumeen Bigarren Mailako Liga bukatzeko. Jaitsiera ekiditeko lehian, bizirik heldu da Mariño, baina irabaztera behartuta dago. Barakaldon jokatuko du igande eguerdian, Pauldarrak arerio zuzenaren kontra. Irabazten duenak, Bigarren Mailan jarraituko du hurrengo denboraldian. Garaipena lortu ezean, maila galduko du Mariñok.

Joan den igandean Irungo zaleak agurtu zituen Mariñok, etxeko azken neurketan. Partida duina egin zuen Logroño hirugarren sailkatuaren aurka, baina ez zuen golik sartu, eta arerioak bakarra behar izan zuen hiru puntuak biltzeko (0-1). Aukera hura galduta, azkenekoan saiatu beharko dira urdinak.

2017-04-25
Hendaiak abantaila hartu du lehen kanporaketan

LEUCATE 18-23 HENDAIA

LEUCATE: Pineda, Samyn, Lauret, Derible, Kalemin, Gaury, Beaux, Rabat, Castany, Delpech, Vincent, Billaud, Barrot, Cadenat, Augustin. Aldaketak: Carrères, Alvarez, Frank, Carruesco, Bellot, Attiel, Chevtchenko.

HENDAIA: Chaudière - Bainçonau, Gaillardet, Ducoté, Jaubert - Jimenez, Lopez - Sallenave, Betachet, C. Pinon - Vial, V. Pinon - Larribe, Azpiroz, Hirart. Aldaketak: Cazet, Ibarburu, Eceizabarreta, Labarthe, Zubizarreta, Laurent, Azpeitia.

Fase finaleko lehen norgehiagoka irabazi du Hendaiak, final hamaseirenetako joanekoa. Leucate arerioa mendean hartu zuen igandean, haren etxean. Partida serioa osatu zuten xuriek, talde sendoa izan ziren, eta aurkarien huts egiteei etekin handia atera zieten. Lehen zaita markagailuan aurretik amaitu zuen Leucatek (18-14). Bigarrenean, ordea, ez zuen Hendaiari punturik egitea lortu. Bidasoarrek bosteko errenta eskuratu zuten itzuliko lehiarako. Egindako lana borobildu beharko dute igandean Ondarraitzen.

2017-04-24
Hutsean amaitu dute Real Unionek eta Arenasek

REAL UNION: Otaño, Gorosabel, Aimar, Esnaola,Azkoiti, Ekhi, Martins (Alonso, 67'), Estrada, Ozkoidi (Mujika, 74'), Hernáez (Arriaga, 57'), Galán.

ARENAS: Talledo, Camus (Txopi, 57'), Royo, Zumalakarregi, Cabero, Matador, Ubis (Toril, 83'), Uranga, López, Zabaleta, Borja Díaz (Ramos, 75').

EPAILEA: Arias Rodríguez. Txartel horiak: Ozkoidi, Hernáez, Ekhi, Gorosabel, Azkoiti (Real Union); Zabaleta, Ramos, Camus, Zumalakarregi.

Gutxieneko etekina atera dio Real Unionek Getxoko Arenasen aurkako nogehiagokari. Txuribeltzei eraginkortasuna falta izan zaie arerioaren atearen aurrean. Defentsan sendo aritu dira behintzat, eta atea hutsean mantendu dute. Bildutako puntua ez da aski izan play-off postuetan sartzeko, baina puntu bakar bat gehiago du orain Leioa laugarren sailkatuak. Hiru jardunaldi dituzte txuribeltzek diferentzia hori gainditzeko. Las Gaunas futbol zelaian izango du Unionek hurrengo hitzordua, UD Logroñesen kontra.

2017-04-24
Las Llanasen irabazi du Real Unionek

SESTAO RIVER 0-2 REAL UNION

SESTAO RIVER: Magunazelaia, Gago, Magdaleno, Jon García, Mier (Santamaría, 64'), Gaizka, Rodri (Leandro, 53'), Armando, Guemes (Ander Franco, 75'), Barrenetxea, Rahmani.

REAL UNION: Otaño, Gorosabel, Aimar, Rodellar, Ekhi, Esnaola, Dani Estrada, Martins (Mikel Alonso, 59'), Galán, Ozkoidi (Azkoitia, 76'), Josu Hernáez (Arriaga, 65').

GOLAK: 0-1. Ozkoidi (61'). 0-2: Galán (p) (82').

Etxean du Sestao Riverrek indarrik handiena. Baina momentu honetan, edozein eszenatokitan irabazteko gai da Real Union. Azken bost jardunaldietan lau garaipen lortu ditu, eta Las Llanasen ere, hiru puntuak bildu zituen ostiralean. Mailari eusteko lehian dabil Sestao, eta estu hartu zuen talde txuribeltza. Lehen zatia orekatua izan zen, erritmorik eta gol aukera argirik gabea.

Bigarrenean, eraginkortasun itzela izan zuen Unionek. Bi abagune eduki zituen, eta bietan, sarean amaitu zuen baloiak. Ozkoidik sartu zuen lehen gola, 66.minutuan, Estradaren pasea baliatuta. Ezkerraldeko taldeak aurrera egin zuen orduan, eta irundarrei sufritzea egokitu zitzaien. Itxura txarra ere hartu zuen partidak, baina 82.minutuan, penalti argia egin zion Gagok Galani, eta aurrelari nafarrak ez zuen hutsik egin. 54 punturekin, sailkapeneko bosgarren postuan jarraitzen du Real Unionek, play-off postuen atarian. Lau jardunaldi gelditzen dira liga amaitzeko. Horietan, sailkapenean aurretik duen aurkariren bat aurreratzen ahaleginduko da Irungo taldea.

2017-04-18
Espainiako Txapelketa irabazi du Oskitz Aguilarrek

Udaberriko Open Espainiako Txapelketan urrezko domina jantzi du Oskitz Aguilar Bidasoa XXI taldeko igerilariak, Pontevedran (Galizia). 49.42ko denbora egin du irundarrak 100 metro libreetako proban, orain arte lortu duen markarik onena. Urrun du, oraindik, Budapest-en jokatuko den Munduko Txapelketan parte hartzeko gutxieneko marka (48.3).

2017-04-12