Larunbateko ekitaldia prestatzen ari zirela hurbildu gara Hondarribira, bihar Amaiur eta Baztango agintariei harrera egin eta senidetzea ospatuko baitute udaletxean. Baina herriak dituen nafar sustraiak aldarrikatzeko deia egin diete hondarribitarrei ere, 12:30ean Arma Plazan, ezpata dantza, txistulari eta herri bietako 130 abesbatzakide bilduko baitira. Ortzi Alonso zinegotziak dioenez, «senidetzea ez delako helmuga, zerbaiten abiapuntu baizik».

Apirilaren 27tik maiatzaren 1era, aurtengo kitarra jaialdiak bost kontzertu jasoko ditu dohainik, Hondarribiko Kultur Etxean, Paradorean eta Irungo Oiasso Museoan. Goi mailako musikariak denak, Fabio Montomolik jaialdirako espreski jazz estilora egokitu duen “Txoria txori” abestiaren bertsioak ikusmina piztu du.