Sandra Cuesta Aizkorbe eskulturgile hondarribiarraren "LIQUID GOGO" obra da Maddalen Arte Garaikiderako Guneak jasoko duen lehenbiziko proposamen indibiduala. Erakusketa baino, erresidentzia artistiko bat da, eta sorkuntza aurkezteko urriaren 10ean, 17an eta 24an herritarrei irekitako topaketak egingo ditu 19:00etatik 21:00etara. Dantza garaikidetik elikatzen diren «eskultura bigun edo likidoak» sortzen ditu, «eskultura bolumena den heinean, soinua, bideoa edo dantzarekin espazioa lantzeko».

Heldu den urriaren 31an hogei urte beteko dira Jose Angel Alzuguren Kotto beratarra Soriako espetxeko ziegan hilik topatu zutenetik. Bitan atxilotu zuten, eta lehendabiziko atxiloaldian torturak salatu zituen. Urteurrena baliatu nahi du Berako Espidobaita Elkarteak «herriak zer gertatu zen oroitu» dezan. Horretarako, Kottori buruzko Loratzen dokumentala aurkeztuko dute, eta bertze hainbat hitzordu ere proposatu dituzte horren harira. Asier Calderon elkarteko kidearekin eta Garazi San Martin dokumentalaren zuzendariarekin biltzeko aukera izan dugu.