Dies Oiassonis jaialdiaren XVI. edizioak Irun Antzinako Erromaren garaian murgilduko du beste behin ere. Sei egunez, hiriko kaleak historiaz, kulturaz eta jai giroz beteko dira, publiko guztientzako ia 50 jarduerarekin. Aurten, gainera, jaialdiak Oiasso Museoaren 20. urteurrena ospatuko du, ondare erromatarraren balioa nabarmenduz. Aizpea Goenaga, Oiasso Museoko zuzendariaren hitzak jaso ditugu

Gipuzkoako Foru Aldundiak 1,2 milioi euro bideratuko ditu 2026 eta 2027 artean eskualdeetako energia-trantsizioa indartzera. Horretarako, Jasangarritasun Departamentuak hitzarmenak sinatu ditu lurraldeko hamar garapen-agentziekin. Egitasmoaren helburua energia berriztagarriak, efizientzia energetikoa eta energia-pobreziaren aurkako neurriak sustatzea da. Bidasoa Bizirik agentzia izango da parte hartuko duten agentzietako bat, eta eskualdean hainbat proiektu berritzaile garatuko ditu.