Hezkuntzan irakasleen %70 inguruk egin du greba eskualdean, eta osasun-langileen artean %30 ingurukoa izan da jarraipena. Goizeko pikete informatibo eta autokarabanen ondorioz, autolerroak sortu dira Amuten eta Jaitzubian eskualdetik Gipuzkoa aldera joateko, baina poliziak zirkulazioa bideratzeko esku-hartu du. Garraio publikoan %30eko gutxieneko zerbitzuak bermatu dituzte, baina autobus asko ia hutsik ibili dira. Goiza istilu handirik gabe pasa bada ere, higiezin-agentzien eta banketxeen kontrako pintaketa ugari egin dituzte, eta Lurraldebusek BI05 linea eten egin behar izan du Urdanibia plazan kale-ekintza baten ondorioz. Arratsaldean (18:00) Zubimuxuko biribilgunetik San Juan plazaraino manifestatzera deitu du Bidasoko Greba Batzordeak.

Asteazken hontan egingo den etxebizitza eskubidearen aldeko greba orokorrak babes zabala jaso du Bidasoan. Sindikatuekin eta hainbat eragilerekin batera, Irungo sei auzo elkartek ere bat egin dute deialdiarekin. Etxebizitzaren krisiak gero eta gehiago baldintzatzen du herritarren egunerokoa: alokairuen garestitzea, etxebizitza eskuratzeko zailtasunak eta gazteen emantzipatzeko ezintasuna dira arazo nagusietako batzuk. Baina krisiak auzoen etorkizuna ere arriskuan jartzen du, bizilagunek beren inguruan bizitzen jarraitzeko dituzten aukerak murrizten baititu. Auzo elkarteek errealitate hori gertutik ezagutzen dute, eta etxebizitza eskubidea aldarrikatzeko mobilizazioarekin bat egin dute. Horren inguruan hitz egin dugu Laurreundi-Olaberria Auzo Elkarteko Mikel Valerorekin.